កំពត៖ «ត្រីឆ្លាមបបែល» ដែលមានឈ្មោះជាភាសាអង់គ្លេស «Shark ray» ជាប្រភេទត្រីសមុទ្រជិតផុតពូជមួយក្បាលទម្ងន់៧០គីឡូក្រាមត្រូវបានអ្នកនេសាទប្រទះឃើញនៅក្នុងភូមិជុំគ្រៀល ឃុំជុំគ្រៀល ស្រុកទឹកឈូ ខេត្តកំពតកាលពីម៉ោង១២កន្លះ ថ្ងៃទី២៨ ខែធ្នូ ឆ្នាំ២០២២។

នាយខណ្ឌរដ្ឋបាលជលផលខេត្តកំពត លោក ស សូរិន្ទ បានបញ្ជាក់ប្រាប់អង្គភាពសារព័ត៌មាន EAC News តាមទូរសព្ទថា «ត្រីឆ្លាមបបែល» មួយក្បាលនេះ ត្រូវបានអ្នកនេសាទម្នាក់ប្រទះឃើញវាហែលមកនៅក្បែរកំពង់ទូករបស់គាត់ ហើយអ្នកនេសាទក៏បានរាយការណ៍មករដ្ឋបាលជលផលខេត្ត។ ភ្លាមៗ រដ្ឋបាលជលផលខេត្តបានចុះត្រួតពិនិត្យ និងលែងវាទៅក្នុងព្រែកកំពង់បាយវិញដើម្បីការពារអាយុជីវិត។

លោក ស សូរិន្ទ បានបញ្ជាក់ថា នេះលើកទី១ហើយដែលរដ្ឋបាលជលផលខេត្តប្រទះឃើញរូបរាង «ត្រីឆ្លាមបបែល» មួយក្បាលនោះ ខណៈវាជាត្រីដែលជិតផុតពូជនៅលើពិភពលោក។

បើតាមលោក សូរិន្ទ «ត្រីឆ្លាមបបែល» មួយក្បាលនេះ ប្រហែលជារស់នៅក្នុងតំបន់ទឹកសមុទ្រជ្រៅក្នុងដីល្បាប់ខេត្តកំពត ហើយក៏វាចូលចិត្តរស់នៅតំបន់ទឹកភ្លាវ។ លោកនិយាយថា៖ «ប្រហែលជាកំពតសម្បូរតំបន់ទឹកភ្លាវ បានវាហែលមកឆ្នេរបានជាប្រទះឃើញវា»។

លោកបន្តថា ក្រោយពីបានលែងត្រីដ៏កម្រមួយនេះ រដ្ឋបាលជលផលខេត្តបានផ្សព្វផ្សាយដល់ពលរដ្ឋ ជាពិសេសអ្នកនេសាទឱ្យរួមគ្នាថែរក្សា អភិរក្សនូវត្រីប្រភេទមួយនេះ។

គូសបញ្ជាក់ថា «ត្រីឆ្លាមបបែល» (Shark ray) ជាប្រភេទត្រីដែលរស់នៅសមុទ្រអាត្លង់ទិកខាងកើត និងសមុទ្រមេឌីទែរ៉ាណេ ហើយវាត្រូវបានចុះក្នុងបញ្ជីក្រហមរបស់អង្គការ IUCN ថាជាសត្វជិតផុតពូជ៕